وتەی سەرنوسەر

لە دنیای کارکردنی ئەکادیمی و مەعریفیدا، تەنیا دەستپێکردن بەس نیە بۆ خۆ سەلماندن و زۆر جار درێژە پێدان ئەگەر لە خاڵی یەکەم گرنگتر نەبێت، ئەوا بە دڵنیاییەوە هیچی لەو کەمتر نابێت. لە هەردوو ئەو خاڵانەش گرنگتر هەوڵدانە بۆ بەرەوپێش بردنی ئاست و چۆنیەتی لە کارکردندا، بە سودوەرگرتن لە ئەزمونی کارەکانی پێشوو.

 ماوەیەک بەر لە ئێستا هەنگاوێکمان لەگەڵ توێژەردا هەڵگرت و ئەمڕۆش دەمانەوێ بە دەرکردنی ژمارە یەکی ئەم گۆڤارە، هەنگاوێکی دیکە بۆ کەشکۆڵی ئەزمونمان لەم بوارەدا هەڵبگرین، هەتا ئەو ساتەی کە بارتەقای ئەزمونمان بگاتە ئاستێک بتوانین چۆنایەتیەکی جیاواز پێشکەش بکەین. 

دەزانین رێگەیەکی دور و درێژمان لە پێشە بەڵام خەونی گەیشتن بە لوتکە بەسە بۆ ئەوەی ئۆقرەی ساردبوونەوەت لێببڕێت و ئەم بێ ئۆقرەییەش بەردەوام کەڵکەڵەی خەونی گەورەترمان دەخاتە سەر.